Psalms 9

Nzambi wuzenga nkanu mu busonga

Nkunga Davidi kuidi pfumu minyimbidi mu lufua lu muana.

1Ndiela kuzitisa, a Yave, mu ntimꞌama wumvimba.
Ndiela yamikisa matsiminanga maku moso.
2Ndiela mona khini ayi ndiela sakadala mu ngeyo,
Ndiela yimbidila nzitusu mu diambu di dizina diaku,
ngeyo Nzambi wuzangama.
3Bambeni ziama balembo vutukisa ku manima,
balembo bumina zithutu ayi balembo bungana
va ntualꞌaku.
4Bila ngeyo wunzengidi nkanu mu busonga, wudedisidi mambu mama ;
ngeyo wuvuendi va kundu kiaku ki kipfumu mu sambisa mu busonga.
5Ngeyo wutemina makanda,
wubunga mutu wumbimbi,
wukubula mvimba mazina mawu mu zithangu zioso.
6Mbivusu yikambulu tsukulu yibuididi bambeni ;
wutiolumuna mavula mawu
ayi malendi buela tebukulu moyo ko.
7Yave wunyalanga mu zithangu zioso ;
wukubika kundu kiandi ki kipfumu mu diambu di sambisa.
8Wela sambisa nza mu busonga,
wela yadila batu mu bufuana.
9Yave niandi suamunu ki mutu weti yamusu ;
suamunu kingolo mu thangu yi ziphasi.
10Babo bazebi dizina diaku,
bela tula diana diawu mu ngeyo.
Bila ngeyo, Yave, wuyekulanga ko
bobo bakutombanga.
11Luyimbidila Yave minzitusu mutu wowo wukala ku Sioni ;
yamikisanu mambu mandi kavanga muidi makanda.
12Bila mutu wowo wumvutulanga landi mu diambu di menga matengolo
wuntebukanga moyo ;
kazimbakananga ko yamikina ku batu badi mu phasi.
13A Yave, tala buevi bambeni ziama
balembo ndiamisa
wumboni kiadi
ayi wundanguna mu mielo mi lufua.
14Muingi ndiyamikisa minzitusu miaku
mu mielo mi muana ndumba wu Sioni,
muingi ndimona khini mu phulusu aku.
15Makanda mabuidi mu dibulu dinneni diodi bakaba ;
malu mawu mabakini mu dikondi diodi batamba.
16Yave wukimonikisidi, mu busonga buandi ;
mutu wumbimbi wukangimini
mu mavanga ma mioko miandi.
17Batu bambimbi balembo vutuki ku tsi bafua,
makanda moso momo mazimbakana Nzambi.
18Vayi nsukami kalendi tumbu zimbukunu ko
ayi diana di batu badi mu phasi dilendi tumbu lalakana ko.
19A Yave, telama !
Bika mutu kabika nunga !
Bika makanda masambusu va meso maku.
20A Yave, wubabuisila tsisi !
Bika makanda mazaba ti badi kaka batu.